Day 60:اجازة عشر ايــــــــــــام في حضن الوطن

و اللي سنين هملوكي

جوه الببان سلسلوكي

و حركات و كده

.

ملحوظة: طيارتي كمان أربع ساعات، وحشتيني يا بلد كتك القرف

الخرطوم في تاريخهم

Day 57:خللي السلاح صاحي..صاحي..صاحي

خدلك ســــــــاااااااتررررررر..................فوفوفووووووووووووووووو

لسه فاكر كويس يوم حصولي على الختم البيضاوي........هييييهاااا.......فرحتي بيه كانت لا توصف...و قعدت ايام كل شوية أطلعه من الدرج و ابص عليه عشان اتأكد انه متمسحش ولا حاجة، و الختم البيضاوي للجنس اللطيف اللي محتكوش بيه....هو ختم الإعفاء النهائي من التجنيد.........النهائييييي، و انا اخدته بحكم اني الولد الوحيد ، بس اخدته بعد طلوع الروح
حتى اسبوعين التربية العسكرية بتوع الكلية قضيتهم على قهوة كيخا، يعني باختصار، معلوماتي عن الدفاع العسكري تقريبا زي معلوماتي عن دورة حياة التين البرشومي بالظبط

مكنتش عارف اني هاجي اعيش هنا......كنت عملت حسابي.....فبالفعل تأتي الطبيعة بما لا تشتهي الأمم

بدأ فصل الخريف في السودان، اه و الله الخريف...انا كنت الأول فاكرهم بيهزرو...او بيسموه خريف من باب اختلاف اللهجات يعني، بس طلع الخريف بجد.....حيث العفار و الغبار و الحر و المطر المستمر و اهم من ده كله..........النامووووووووووس

من شهرين و قبل سفري للسودان رحت اطعمت كل انواع التطعيمات اللي في الدنيا...و لكن بحكم ظروفي الصحية الحالية ماكنش ينفع اتطعم ضد الملاريا...عشان التطعيم بتاعها كان كفيل انه يقضي عليا، و تطعيم الملاريا عبارة عن أربع حبات تأخذ عن طريق الفم، فما اخدتهمش

بدأ موسم الناموس، و بدأت اعراض البارانويا تظهر على العبد لله.....فبالنسبة لواحد عايش هنا و مش متطعم ضد الملاريا...أي حاجة بتتحرك حجمها أصغر من كلب الشيواوا بتبقى عدو خارجي كاسر يجب القضاء عليه
نقلت التلفزيون غرفة النوم، جبت تلاجه صغيرة حطيتها هناك، و سخان الشاي الكهربائي، و بقت غرفة النوم هي حصني الحصين، خصوصا ان الغرفة فيها حمام
و كل يوم و بدون أي ملل، بنبه على سماهر – وزيرة النظافة – انها ماتفتحش شباك غرفة النوم و هي بتنضفها، و تقفل الباب وراها و هي داخلة ووهي خارجه منها و ترش القوضه سبع رشات

كنت فاكر ان انواع الحشرات اللي شفتها في بانكوك هي اغرب انواع الحشرات على الاطلاق ، بس السودان نقلتني نقلة نوعية في علم الحشرات، هنا انا شفت حشرات اعجب و اعجب.... حشرات زاحفة..... حشرات طائرة....حشرات بتسحب كرسي و تقعد جنبك...و اخطرهم على الاطلاق...حشرات تبعتلك جوابات تهديد..و تتصل بيك و تقفل السكة

احجام الحشرات هنا غير ادمية بالمره.........توقعها في أي مكان...في أي وقت....أينعم معظمها مش من النوع المؤذي...بس مجرد انك تلاقي حاجة قد الدرفيل داخله عليك و بترعشلك عشان تعدي..دي في حد ذاتها مش تجربة ظريفة بالمرة

شعبيتي في السودان بدأت تقل جدا مع دخول موسم الناموس...درجة تركيزي في أي حوار مع أي حد نزلت النص...اتصال الأعين في الخطاب بقى معدوم تقريبا....معظم حواراتي مع الاخرين دلوقت بقت لا تتعدى التلاتين ثانية...و غالبا بتنتهي بجملة: و الله عيب يا اخ زياد اكون بكلمك و تطلع تجري كده

واد يا عماد..هي الملاريا منتشرة هنا قوي يعني؟-
يضحك-
لأ و حياة أمك...مفيهاش ضحك دي-
يضحك بصوت أعلى-
طب و من نبى النبي نبي يا عماد يا ابن..هي امك اسمها ايه ياله؟ لأكون ملبسك قضية انقلاب على النظام الحاكم و اقول انك بتجيب شوية عيال من الجنوب كل يوم بالليل هنا تعملو اجتماعات سرية
انطق ياد-
ضاحكا: و الله يا سيدي منتشرة كتير ااه، بس في الخرطوم الموضوع مش كتير قوي زي خارج الخرطوم، يعني انا مثلا من ساعة ما جيت الخرطوم من اربع سنين مجاتليش ملاريا من ساعتها
يعني ايه؟ جاتلك قبل ما تيجي يعني؟-
ااه من اربع سنين ، بس خلاص راحت-
واد يا عماد، الملاريا يا حبيبي لما بتيجي ما بتروحش...بتهمد شوية بس..يعني مالهاش علاج و لامؤخذه-
يضحك
انت بتهزر و لا بتتكلم جد؟-
يا استاذ زياد،اكتر من تلات تربع السودان جالها ملاريا.. و خلاص بناخدلها حبتين كل ست ساعات و بعدين حبة كل اسبوع و خلاص بتروح
طب قوم ياد من قدامي السعادي-

ملحوظه: عماد قاعد يخبط على باب البيت من ساعتها، و انا قاعد في القوضه مشغل اغنية صوووت بلادي بينادي بيلالي...ومعليها على الاخر

الخرطوم في تاريخة...و خدلك سااااااتررررررر

Day 51: أخوكو بيشرفكو

انت بتسطعبط يا اسامه؟ انت لسه نايم؟ طيب خلاص البس انت و انا هعدي اخدك من البيت و نطلع على المطار على طول، عشر دقايق و تكون قدام الباب

اسامه؟

تعتبر مدينة جوبا مركز جنوب السودان و يعتبرها سكان الجنوب عاصمة لهم، وهي تقع على بعد 1200 كم جنوب الخرطوم، يعني شارعين من أوغنده

بعد الحاح طويل أقنعت صديقي السوداني بزيارة جوبا، خططنا للذهاب يوم الأربعاء الماضي و العودة صباح اليوم التالي،و ذلك نظرا لمواعيد رحلات الطيران الداخلي للخطوط السودانيه، الإقلاع في تمام السادسة من صباح الأربعاء و العودة بعد24ساعة، وقد كان

وصلنا المطار في تمام الرابعة والنصف صباحا

يرجى الانتباه.. تعلن الخطوط الجويه الكينيه عن قيام رحلتها رقم 712و المتجهه إلى نيروبي، و على الساده المسافرين التوجه إلى بوابة الخروج رقم 3

يرجى الإنتباه....... لا تعلن الخطوط الجويه السودانيه عن أي شيئ بخصوص رحلتها رقم 102 و اللي بعون الله متجهه إلى جوبا، و على السادة المسافرين .....ههههههههه.....و على الساده المسافرين...ههههه.....وشكرا

في تمام الساعة الثامنة و النصف صباحا وبعد مناقشات وديه استمرت عدة ساعات مع موظفي مكتب الخطوط السودانيه توصل الطرفان إلى ورقة تفاهم مبدئي نصها كما يلي

من باب حرية المعتقد تم الاتفاق على فض الخلاف بين الطرفين مع الاعتراف بحق كل طرف بالتمسك بمعتقده، و قد اتفق الطرفان على ما يلي

أولا: يعتقد الطرف الأول - اللي هو انا- بأن الخطوط الجوية السودانية تتبع مدرسة البرنسيسة في التعامل و الذي ينص على أن البرنسيسة تيجي وقت ما تيجي و تروح وقت ما تروح- برنسيسة بقى ياخوانا- وعلى المتضرر أن يولع في نفسه بجاز وسخ، على أن يكون التوليع بعيدا عن مبنى المطار، و يتحمل العميل تكلفة الجاز، و يحق للعميل تحديد درجة وساخة الجاز حسب تضرره

ثانيا: يعتقد الطرف الثاني - اللي هو هما- بأن الطرف الأول ينتمي لبيئة غيرمأهولة بأي نوع من أنواع الرقي أو الحضارة،و انه ينحدر من سلالة تستخدم حركات غريبة بيديها للتعبير عن رأيها، وأن هذه السلالة تقطن مناطق جبلية شديدة الإرتفاع و البرودة مما تسبب في وجود التهاب حاد مزمن في جيوبهم الأنفيه و الذي يجعلهم يخرجون أصواتا أغرب من أنوفهم

و على فكرة يا أخ حتى لو الرحلة دي ما اتلغت، انت حجزك إتلغى

هأأأأووووووووو ، ده عند أم الهنني

بكرامة و عزة نفس وصلت اسامة بيته و انطلقت إلى المصنع................ خسارة اليوم يتحسب أجازة على الفاضي

صباح الخير يا شباب، معلش انا قلت اجي النهاردة كاجوال بدل الجو الرسمي اللي احنا عايشين فيه ده، انا من رأيي نعمل يوم الأربع يوم الكاجوال الإسبوعي...... إيه رأيكم؟ .........هاه؟..............ألا صحيح حد يعرف من هنا لجوبا بالعربية تاخد قد إيه؟

ملحوظة: لا ينصح لحاملي الجنسية المصرية التواجد في أو قرب مطار الخرطوم حتى عام 2010

تحديث: الملحوظة من ضمن معتقد الطرف الأول الشخصي في البند الأول من اتفاقية التفاهم

الخرطوم في تاريخه بتصفح

Rent A camel.com

Day 45: اسبوع التلات

حقا شعور رائع
يتسرب الضوء على إستحياء إلى غرفة نومك في الصباح الباكر...فتفتح عينيك بتثاقل ناظرا في الساعة، طامعا في خمس دقائق إضافيه من النوم قبل يوم عمل طويل جديد، تتذكر أنه يوم الجمه ، فتبتسم بهدوء وتغلق عينيك محاولا اللحاق بشريط الأحلام المتلاشي
لا يعكر صفو نومك الجميل سوى إنقطاع الكهرباء و بالتالي إنقطاع تتدفق الهواء البارد الجميل من جهاز التكييف، ولكن على كل حال نكتفي بهذا القدر من النوم
الساعة العاشرة صباحا، وقت مناسب لأخذ حمام بارد
إعطني الناي و غنييييييييييييي .....فالغنااااا سر الوجوووووووووووود

النهارده السبت......النهارده السبت.....أنا عندي شغل.....لأ لأ لااااااااااااااااااااااااااااااا

عمااااااااااااااااااااااااااااااااااااااااااااااااااااااااادإوعى ..فين...البس....معجون السنان...الجزمه.....أوعى...أي...أي....المفتاح...مش لازم كرفته النهارده...إجرى..الساعة عشرة و عشرة و عندي إجتماع مهم الساعة تسعة و نص في المكتب...الطريق تلت ساعة..ممكن ألحق....القميص ده عايز يتكوي...طز، خليك عملي....إجري

الاسبوع اللي فات بدأ بدايه غريبة جدا كانت دليل على إنه إسبوع من إياهم...من الأسابيع اللي كل أيامها تلات

مفيش حاجة مشيت صح....ولا حاجة

السيرفر في المكتب جاتله حالة عبط مكسيكي...و الزميل العزيز المسؤول عن السيرفر في أجازه ،عنده امتحانات بسلامته

الو ،صباح الخير يا أستاذ زياد-
ااه إن شاء الله-
خير فيه إيه؟-

السيرفر واقع و الناس مش عارفه تشتغل-

ضاحكا: ااه مهو بيعمل كده كتير-

الغضب حماقه يا حوريه

انا ضاحكا بغيظ: احنا بقى مش عايزينو يعمل كده تاني-

طيب تمام-

تمام دي إجابه ولا سؤال عشان بس ابقى فاهم-

اااه يعني عايزني اجي؟-

ده لو ميدايقش سعادتك يعني، ولو فيه أي حد في المنطقه اللي انت ساكن فيها عنده دم-

مينفعش تمشوا حالكم لغاية السبت اللي جاي؟-

معرض كيفين كارتر إتلغى..ندوة الشعر العمودي قلبت بغم لما واحد من الحضور جتله أزمه قلبيه..الأمسيه النوبيه باظت عشان الفرقه مجتش
والجو طول الاسبوع شككني في نفسي بجد، بقيت مش عارف انا بتابع أخبار أحداث نهر البارد من باب الوعي بالقضايا العربيه ولا من باب إن الإسم شدني في الحر ده

إنتهى الاسبوع أخيرا الحمد لله من تلت ساعة بالظبط

ربنا يكفيكم شر أسابيع التلات المكرر

ملحوظة: مفيش ملحوظه المره دي على فكره

الخرطوم في تاريخه