Day 78: تلخيص الابريز لما خلقتك تلبس في البربريز

ورد في مقدمة كتاب "وصايا الترحال" للعبدلله

و اضرب في الأرض سائحا و هائما و مخيما، اضرب في الأرض و احذرهم
أسد جبلي جائع
دب قطبي غاضب
جمل سوداني مش مستعجل

من الواضح إن العبدلله مقراش المقدمه كويس

انا خلاص في نص الطريق الدائري، يعني قدامي تلت ساعة إن شاء الله كده و أوصل، إتحرك انت كمان عشر دقايق بالظبط، هقابلك قدام باب البنك و نطلع سوا، سلام يا ميزو

ياسلاااام ، متعة فعلا السواقة في الجو ده، هواء نقي منعش، ريحة الأرض بعد يوم كامل من المطر العنيف بتبقى ساحرة بجد، و يا سيدي على مزيكة زياد رحباني و الافكار الجميلة اللي في دماغ الواحد بقالها كام يوم
الاسبوع الأول خلاص بيخلص، عدى بسرعة قوي بصراحة، يمكن عشان لما رجعت من الأجازة لقيت مشاكل كتير جدا مستنياني في الشغل فأخدت كل وقتي، يمكن لأن مودي حلو قوي اليومين دول عشان لسه شاحن البطارية في الأجازة، و يمكن عشان الجو الاسبوع ده كان جديد عليا في السودان
مطر و غيام طول اليوم بكميات تجارية، و انا من عشاق الشتا – اللي هو المطر بس بلهجتي السكندرية العريقة- قمة الاستمتاع الصراحة، هي الميه اللي نازلة ممكن تسلق فيها بيض صحيح بس برضه شتا يعني، و اهو برضه تغيير، كفاية أومليت بقى

الطريق الدائري بيربط المنطقة الصناعية بتقريبا كل حته في الخرطوم، و انا كان ميعادي في وسط المدينة ، بس حبيت اهرب من زحمة مداخل الخرطوم بسبب المطر، فاخذت طريق تاني اطول شوية بس فاضي
هو مكانش فاضي قوي الصراحة

سرعة عادية جدا تتناسب مع حالة الهدوء النسبي اللي انا فيها حاليا، و از فجأة قرر ابن الدزمة يعدي الشارع مرة واحده

أؤمن بالواقعية
أعشق المنطق
و لا أفهم إلا النقاش الموضوعي

انا عارف انك مش هتعرف ترد عليا، لأسباب إحنا الاتنين عارفينها كويس
مش عايزك ترد، بس عايزك كده لما تقعد مع نفسك بالليل، تحاول تسأل نفسك الكام سؤال دول، و خليك صادق مع نفسك في الإجابة، عشان على الأقل تكسب إحترامك لذاتك و كينونتك

أنا ليه عديت الشارع أساسا؟؟؟
في ظل حيز إهتماماتي ،الناحية التانية فرقت إيه عن أم الناحية دي ؟
هو انا ليه بعدي الشارع على أقل من مهلي كده و كأني قايم أدخل حمام بيتنا بالليل؟
هل توقفي عن المشي في نص الشارع و نظرتي بابتسامة بلهاء لمصدر كلاكس العربية اللي كانت جاية عليا دي هو اللي أنقذني من موت أكيد؟
هو فيه علاقة بين الميه اللي على الأرض و صوت الفرملة و دوران العربيات و السيرك القومي؟
هو لما العربية تقعد تلف كده و تخبط في مقطورة راكنه على جنب و انا أكمل مشي عادي كده تبقى قلة زوق مني؟
هو فعلا فيه علاقة بين الديك و بين ابويا زي ما الشخص اللي طلع من العربية المخبوطة دي كان بيقول؟
و أهم من ده كله، هو انا ليه فيه على ضهري سنم؟
هو انا كائن غبي فعلا، ولا دي عنصرية حقيرة من الأخ ده؟

الحمد لله جات سليمة، شوية خدوش و رتوش خفيفة، مع شرخ خفيف جدا في اليد و كره دائم للجمال.

ملحوظة: بما إن دي تاني حادثة سيارة ليا في الخرطوم، و تالت حادثة ليا في شهرين و نص، فقد تأكددت شكوكي أن الشارع العربي في أمس الحاجة إلى إصلاح حقيقي، و سفلته أنضف شوية

الخرطوم في تاريخة