Wednesday, May 2, 2007

Day 19: بس هشربها


دواوين و دواوين فعلا مش هتكفي اللي شفته في الكام يوم اللي فاتو، شعب إجتماعي و عشري جدا، اتعرفت على نص السودان تقريبا في الفترة الصغيرة دي، من أول وزير الثقافة و وزير التجارة حتى الست حنان بتاعت عشة الخرفان في سوق الناقة ، و سوق الناقة يعتبرجزء متطرف من سوق ليبيا الكبير و شديد الإزدحام في أم درمان هبقى اكتب عنه بوست كامل بعدين


فعلا استمتعت كتير جدا، ما كانش فيه وقت كتير فاضي بحكم كمية الشغل المرعبة اللي كانت مستنياني علشان المصنع الجديد بس برضه كنت باستخسر انام و كنت بخلص شغل و انزل الف لغاية لما الناس تصحيني في الشوارع
اسكن الان في منطقة الرياض اركويد بالخرطوم، و تعتبر المنطقة من أرقى أماكن العاصمة المثلثة و لكن اللي يمشي على البلد هيمشي عليك انت كمان طبعا، يعني مثلا


صباح الخير يا استاذ زياد ، قالها عماد بابتسامته المعهودة-
صباح الطين البني على الصبح
ضاحكا: ليه كده بس -
من ابسط حقوق المواطن انه يستحمه على الصبح، الميه لونها بني يابني، بني!!!! ما انا سايبها امبارح بالليل كويسه
معلش أصل في تصليحات في الخزان-
و الحل يا عماد؟-
يضحك
أعمل إيه انا بالضحك ده؟-
يضحك
للعلم ، الضحك بالنسبة للشعب السوداني في بعض الأحيان يعتبر إجابة بليغة و كافيه جدا، و في المدة القصيرة التى قضيتها هناحتى الان تعلمت القليل جدا من لغة الضحك، أعتقد أن رد عماد كان: جرى إيه يا عم النضيف عالصبح، انت هتقرفنا ليه، ما انت نازل المصنع كمان نص ساعة و علبال ما توصل للعربيه هتكون عرقتلك اتنين لتر و ابقى سلملي على البادي سبراي يا حبيبي
قلما يمر يوما هنا بدون انقطاع كهربائي أو مشاكل في المياه، بس انا عندي مبدأ في الحياة لن أحيد عنه أبدا
و قلته لجماعة مصريين قابلتهم هنا و زعلو مني!!! مش عارف ليه
من أول ما اتعرفت عليهم وهما هاتك يا شكاوي،،أصل الميه أصل الكهربا،، أصل الجو،،أصل مافيش ولا مول!!!!وكان قاعد معانا شاب سوداني كان باين عليه الإحراج و الإنزعاج من اللي بيقولوه، فقلتلهم: يا جماعه الموضوع بسيط جدا، اللي مش عجباه البلد، يمشي، و اللي مش قادر يقعد في البلد باحترام يبقى أحسنله يمشي،،،إيه بقى العيب في اللي قلته؟ زعلو مني جدا
هبقى أصالحهم لما أشوفهم تاني
تحديث >>لما رجعت البيت علشان اكتب البوست ده، أول ما دخلت من باب الفيلا لقيت عماد بيضحك!!!! الظاهر مش هستحمى
كورنيش النيل الأبيض -20/4/2007 الساعة حبه كويسين كده باليل

2 comments:

سلسبيل said...

هههههههههههههه عماد دا شكله دماغ لوحدة..الغريبة ان اغلب الناس اللي اعرفهم ..عاملين زي عماد..نفس الفكرة ونفس التفاؤل كده..بس عموما قلبي اتفتحله لانه سوداني..ومع اني ماعرفش شخصيا حد من السودان
بس انا بحب الناس دي وبحس فيهم باحترام وقيم ودين لسه الظروف الصعبة ماخلتهمش يفقدوها بعد الزمن ده كله
يمكن اكون صح..يمكن اكون غلط...
عموما
بجد المدونة جميله جدا ودي اول زياره ليها بس اكيد مش الاخيره ان شاء الله
تحياتي

Xee said...

سلسبيل

شكرا على مرورك
:)

على فكرة انت صح جدا ، الشعب ده من أطيب شعوب العالم بجد

و ابقي شرفيني على طول

تحياتي