Saturday, June 9, 2007

Day 51: أخوكو بيشرفكو


انت بتسطعبط يا اسامه؟ انت لسه نايم؟ طيب خلاص البس انت و انا هعدي اخدك من البيت و نطلع على المطار على طول، عشر دقايق و تكون قدام الباب
اسامه؟

تعتبر مدينة جوبا مركز جنوب السودان و يعتبرها سكان الجنوب عاصمة لهم، وهي تقع على بعد 1200 كم جنوب الخرطوم، يعني شارعين من أوغنده


بعد الحاح طويل أقنعت صديقي السوداني بزيارة جوبا، خططنا للذهاب يوم الأربعاء الماضي و العودة صباح اليوم التالي،و ذلك نظرا لمواعيد رحلات الطيران الداخلي للخطوط السودانيه، الإقلاع في تمام السادسة من صباح الأربعاء و العودة بعد24ساعة، وقد كان

وصلنا المطار في تمام الرابعة والنصف صباحا

يرجى الانتباه.. تعلن الخطوط الجويه الكينيه عن قيام رحلتها رقم 712و المتجهه إلى نيروبي، و على الساده المسافرين التوجه إلى بوابة الخروج رقم 3

يرجى الإنتباه....... لا تعلن الخطوط الجويه السودانيه عن أي شيئ بخصوص رحلتها رقم 102 و اللي بعون الله متجهه إلى جوبا، و على السادة المسافرين .....ههههههههه.....و على الساده المسافرين...ههههه.....وشكرا

في تمام الساعة الثامنة و النصف صباحا وبعد مناقشات وديه استمرت عدة ساعات مع موظفي مكتب الخطوط السودانيه توصل الطرفان إلى ورقة تفاهم مبدئي نصها كما يلي

من باب حرية المعتقد تم الاتفاق على فض الخلاف بين الطرفين مع الاعتراف بحق كل طرف بالتمسك بمعتقده، و قد اتفق الطرفان على ما يلي

أولا: يعتقد الطرف الأول - اللي هو انا- بأن الخطوط الجوية السودانية تتبع مدرسة البرنسيسة في التعامل و الذي ينص على أن البرنسيسة تيجي وقت ما تيجي و تروح وقت ما تروح- برنسيسة بقى ياخوانا- وعلى المتضرر أن يولع في نفسه بجاز وسخ، على أن يكون التوليع بعيدا عن مبنى المطار، و يتحمل العميل تكلفة الجاز، و يحق للعميل تحديد درجة وساخة الجاز حسب تضرره

ثانيا: يعتقد الطرف الثاني - اللي هو هما- بأن الطرف الأول ينتمي لبيئة غيرمأهولة بأي نوع من أنواع الرقي أو الحضارة،و انه ينحدر من سلالة تستخدم حركات غريبة بيديها للتعبير عن رأيها، وأن هذه السلالة تقطن مناطق جبلية شديدة الإرتفاع و البرودة مما تسبب في وجود التهاب حاد مزمن في جيوبهم الأنفيه و الذي يجعلهم يخرجون أصواتا أغرب من أنوفهم

و على فكرة يا أخ حتى لو الرحلة دي ما اتلغت، انت حجزك إتلغى

هأأأأووووووووو ، ده عند أم الهنني


بكرامة و عزة نفس وصلت اسامة بيته و انطلقت إلى المصنع................ خسارة اليوم يتحسب أجازة على الفاضي

صباح الخير يا شباب، معلش انا قلت اجي النهاردة كاجوال بدل الجو الرسمي اللي احنا عايشين فيه ده، انا من رأيي نعمل يوم الأربع يوم الكاجوال الإسبوعي...... إيه رأيكم؟ .........هاه؟..............ألا صحيح حد يعرف من هنا لجوبا بالعربية تاخد قد إيه؟

ملحوظة: لا ينصح لحاملي الجنسية المصرية التواجد في أو قرب مطار الخرطوم حتى عام 2010
تحديث: الملحوظة من ضمن معتقد الطرف الأول الشخصي في البند الأول من اتفاقية التفاهم
الخرطوم في تاريخه بتصفح
Rent A camel.com

18 comments:

loumi said...

صباح الخير يا مشرفنا
يعنى لازم تروح جوبا دى؟
انت الغلطان
مالها قهوة مش عارفه اسمه ايه
اللى بتقعدوا عليها دى؟
انا شفت البوست امبارح بالليل فى حركه جدعنا منى اخذت الكمبيوتر التانى للبيت قال ايه ادهم حيراجع امتحانات على النت
قلت يا بت خليكى ام جدعه وجربى
و طبعا امى صالت وجالت
وقالت البوقين بتوعها وانا اخذتهم فى جنابى وسديت بوقى
المهم بعد ما الافندى خلص قلت اشوف
لقيت تعليق الباشا
اللى هو حضرتك
قلت طيب
نشوف كاتب حاجه جديده
وقد كان الباشا مشرفنا
ايه ؟
مين؟
فين؟
جوبا
يادى النيله
هو الياشا ده مش حيهمد بقا
المهم وما اطولش عليك
هههههههههههههههههه
اول ما وصلت عند صورة الطياره
الولاد هلكوا على روحهم من الضوحك
قلت اه الليله باظت يا جدعان
وعنك ورحت قافله الكمبيوتر
ويالله انت وهو وهى خشوا ناموا
خوووووووووووووووو
تحياتى
ورحله سعيده
على الجمل ان شاء الله
قال
rent a camel.com
قال
:):):)

zenzana said...

خلاص حبكت معاك جوبا دي؟
وكمان حاطط الطيارة اللعبة دي؟ شرفتنا
ويقولك كدة م المطار وتمشي كدة عادي؟
اقولك بقي انا عملت ايه؟ كنت مرتبة زيارة لالمانية بالقطار من ايطاليا والمفروض اعبر النمسا ف السكة ولحد قبل السفر بيوم مأخدتش الاقامة، ابوظ الرحلة والخطة؟ لا طبعا ركبت القطر وبعدين كملت تاكسي واتكرر الموقف تاني بعدها بشهرين اخدت التاكسي مباشرة ههههههههه
والله فكرتني اعمل مدونة رحلات بنت بطوطة في بلاد المكرونة المقصوصة
تحياتي

أسوور said...

موتنى على نفسى من الضحك بجد
خاصة فى بنود الإتفاقية

متخيلاك واقف فى المطار بتتخانق وتخيلت كل حركة وكل كلمة وكل صوت صدر فى المناقشة

معلش تعيش وتاخد غيرها

بس موضوع الحظر دة كنت هأصدقه لولا انى عملت سيرش وطلع فى الكالتشة يا باشا

كالعادة ملحوظة فى الجون
تحياتى

Xee said...

لومي
صباح شريف يا فندم

خوووووووووو؟؟ فعلا؟
ههههههههههه
اسلوب هايل الصراحة عشان تنيمي بيه أولادك
ههههه

ربنا يخليهم لك يا رب و يطلع حد فيهم طيار قد الدنيا
و يبقى يشوفلي صرفة في موضوع جوبا ده

تحياتي
خووووووو

Xee said...

والله يا زنزون هي حبكت الصراحة و الموضوع بقى مسألة مبدأ
ههههه

أصلي بصراحة طالما انا في السودان يبقى لازم أشوف كل حاجة فيها
و جنوب السودان يا فندم تقريبا نص مساحة مصر و تلت سكان السودان و ثقافته مختلفة تماما عن ثقافة باقي السودان

أما بخصوص موضوع اني أمشي كده عادي، صدقيني ممشيتش عادي خالص ، بمعنى أدق انا تم إجلائي بالقوة
:)

مش احنا يا باشا اللي يتقلنا حاجة و تمشي عادي
===========================
ههههههههههههه

بنت بطوطه في بلاد المكرونة المقصوصة

و الله فكرة هايله
ههههههههههه

تحياتي

و برضه هتصرف و اروح جوبا

Xee said...

ياسمين


عملتي سيرش على موضوع الحظر
ههههههه
ربنا يخليكي يا رب، بشكرك على ثقتك العاليه بكلامي

تحياتي

منة الله said...

xee


ادعوك للمشاركة في استفتاء اكثر 10 مدونات تاثيرا في قرائها

عل مدونتك تكون واحدة منهم

اليك الرابط

http://www.6ef.blogspot.com/

ذو النون المصري said...

و الله انا فضلت اقرا لحد ما وصلت للطياره اللعبه و فشلت في تحديد ما هية الطياره
ايه اللي في الصوره ده و فضلت مركز لحد ما فهمت انها جناحين و مروحه و جسم طياره فضحكت
بقي الطياره بالشكل ده
يبقي السياره افضل
هههههههههههه

Gid-Do - جدو said...

زياد

الله يحظك ـ فكرتنى بصديق سودانى اخصائى انف واذن وحنجرة ومتزوج من مصرية من اسوان راح اشتغل طبيب فى جنوب السودان ـ افتكر كنوع من التكليف ـ وكان له نوادر لا ليها اول ولا اخر هناك

من ضمن نوادره مع الناس هناك ـ يطق فى دماغ واحد من الناس اللى شغالين معاه هناك انه يغير اسمة ـ يكون اسمه جون على سبيل المثال صحبنا الدكتور يفضل يندة علية ياجون ياجون وجون متنح ولا عاوز يرد فيروح صاحبنا الدكتور رايح لغاية عندة ويسالة مبتردش عليا ليه؟ يقولة علشان انا مش جون فيساله امال انت مين فيقول اسمة الجديد ماشى ـ كام يوم ويتنح تانى وميردش لانه غير الاسم مرة تانية


الكل هناك بيشرب شراب مسكر يسمى الماريسة ....نسيب دة لحكاية تانية

ياترى فين ايامك يادكتور احمد ابو صادق ـ ده اسم صديقى ـ تحياتى

يا مراكبي said...

ههههههه

دي مش خطوط طيران بقى .. ده إنت إخترت خطوط توك توك ولا إيه؟

ده كان نظام شييييييي .. حاااااااا

أخونا ومشرفنا ومش هنخش السودان بسببك تاني وهتقطع العلاقات اللي مش ناقصة قطع أصلا

Xee said...

منة الله

الله يخليكي

ههههههه

أكثر المدونات تأثيرا ، هو حضرتك مقريتيش أي بوست من مدونتي دي ولا إيه؟
انا المدونة دي مبتأثرش حتى فيا سعادتك

يالا هانت ان شاء الله كام شهر و تخلص

تحياتي

Xee said...

العزيز ذو النون

سيارة مين سعادتك؟ المشكلة مش في طول الطريق من هنا لجوبا، المشكلة في ان مفيش طريق أساسا، بتكلم بجد

من بعد الخرطوم بحوالي 600 كم جنوبا مفيش أي طرق تودي أي حته

تحياتي

Xee said...

جدو العزيز

هههههههههههههههه

حلوة نوادر دكتور أحمد دي، و فعلا، اذا كانت النوادر هنا لا حصر لها، أمال في الجنوب هتبقى عاملة ازاي

انما ايه المشروب ده يا جدو؟ من باب العلم بالشيء بس يعني

ههههه

تحياتي

Xee said...

مراكبي باشا

ههههه أه والله توك توك ، الست أول مره أسألها، يعني الطياره هتيجي امتى؟
معرفش
طب هي فين دلوقت؟
معرفش، هتلاقيها زمانها جايه
فاضريت أقولها إن ماما هي اللي زمانها جايه يا عنية

تحياتي

Gid-Do - جدو said...

زياد

المريسة ـ شراب مسكر ـ حسب وصف الدكتور احمد انه زى البوظة المصرى

اسال علية يمكن حد يقولك بيتعمل من اية بالتحديد

Xee said...

منتحرمش يا جدو

:))

daktara said...

صورة بالف كلمة
مدونة جديدة
انظر حولك
د . خالد عزب

Xee said...

د.خالد عزب، هه؟
و طب و طالما دكتور، ليه بتسوق لنفسك باسلوب الفلايات في الاتوبيسات؟